Stjörnurnar bakvið snjóinn

Ný orðinn sautján ára í janúar fyrir svo ótrúlega mörgum árum að keyra í kúkabrúna Altoinum mínum sem komst í 60 niður brekkur og það snjóar á rúðuna þegar þetta laga heyrist í útvarpinu.  Og ég stoppaði bílinn og hækkaði í botn.  Útvarpið var það eina sem virkaði.  Miðstöðin gerði það eitt að auðvelda snjónum inngöngu í bílinn.  Og ég sat og hlustaði á þetta lag og reykti og hugsaði um það í unggæðingsskap mínum að lífið væri ömurlegt og enginn skildi mig og engum þætti vænt um mig og allt það sem unglingar með óuppfylltar kynferðislanganir hugsa.  Og það snjóaði og rúðan á bílnum varð hvít af þykkum nýföllnum snjó og mig langaði ekki heim og steig út úr bílnum, lagið ennþá í bakgrunni og í gegnum blauta drífuna gat ég séð að himininn var dökkgrár því að handan við það svarta, blikaði á stjörnur.

Athugasemdir

[Ragga (IP-tala skráð) 3.4.2008 kl. 20:26]

Þetta lag er svo frábært, eitt af uppáhalds þegar að stemningin er þannig.

[Kreppumaður, 4.4.2008 kl. 01:43]

Þegar maður vill þunglyndi og eymd!