Góður staður

Ætlaði að blogga um einhentan mann sem ég sá drekka séniver á bar á heimsenda einu sinni.  Það var engin á barnum nema hann sem sat og þjóraði með aðra úlpuermina dinglandi tóma...

Svo kom inn kona sem hefði getað verið vændiskona á eftirlaunum og bað um bjór.  Og úti hnituðu mávar hringi yfir barnum og brim svarf klappir og ég hafði ekki hugmynd um hversvegna ég var staddur þarna.  Sat bara og fylgdist með þeim einhenta verða fyllri og fyllri.

En ég hætti við þessa færslu.  Hún hafði ekkert upphaf eða endi.  Og þjónaði engum tilgangi.  Nema bara til að segja að þegar ég stóð upp skálaði sá einhenti við mig og sagði: óþarfi að fara, allir staðir eru eins. Þessi er ekki svo slæmur! 

Með það hvarf ég út og horfði á fjöll og haf og hugsaði með mér að þetta væri ekki svo slæmur staður til þess að vera á...

Athugasemdir

[Guðmundur G. Hreiðarsson (IP-tala skráð) 17.4.2008 kl. 10:30]

Þetta er nú soldið í anda Blyton, nema hvað hún minntist aldrei neitt sterkara en engiferöl.

[Kreppumaður, 17.4.2008 kl. 14:27]

Blyton lét líka fólk giftast bara til þess að geta fylgst vel með börnum.  Það er verra en kínverskt hjónaband!