Kreppublogg

26.4.2008 | 19:41

Undirbúningur

Varði deginum í því að vera ekki fyrir við fermingarundirbúning. Og stóð mig vel í því. Tókst alltaf að komast hjá erfiðum og flóknum verkum og gera mig ósýnilegan og heyrnalausan þegar mamma kallaði á mig. Sérstaklega varð ég daufdumbur þegar hún sagði mér hvað ég ætti að borga. Loksins þegar hún náði athygli minni með kostnaðinn þá spurði ég hvort að þetta væri ekki örugglega upphæðin í gjaldmiðli Trinidad og Tobacco? Nei, víst þessum hraðfallandi íslensku krónum. Og eftir að hafa borgað minn hlut þá verð ég víst að segja mig á sveitina til þess að geta átt fyrir hnefafylli af grjónum til þess að lifa af út mánuðinn. Og núna liggur við að ég óski þess að sonur minn verði aldrei stúdent eða giftist eða eitthvað annað sem krefst þess að karl faðir hans þurfi ekki að opna sín mögru pyngju. Jæja, á mánudaginn þarf ég að fara og leysa út hluta af sparnaðinum mínum sem ég hafði ætlað að nota til þess að lifa óábyrgu og rótlausu lífi í sumar fyrir. Sem betur fer sé ég ekki fram á aðrar fermingar í bráð svo það er óþarfi að gráta mikið.

Flokkur: Bloggar | Facebook

Athugasemdir

Mínar eru sorgirnar þungar sem blý. Ég kvíði fyrir jarðarförinni. Hún kemur til með að kosta sitt.

Bergur Thorberg, 26.4.2008 kl. 20:49

Ég ætla að láta hola mér niður utan kirkjugarðs á kostnað hreppsins sem hver annar niðursetningur.

Kreppumaður, 26.4.2008 kl. 21:09

Hvað með niðursetningakirkjugarð? Við verðum að fara að safna. Í Niðursetningasafnaðarbaukinn. Ekki ráð nema í tíma sé tekið. Og ekki seinna vænna fyrir ræfla eins og okkur.

Bergur Thorberg, 26.4.2008 kl. 22:22

Sá baukur er ennþá svo galtómur að það sé synd að það sé ekki búið að stofna niðursetninganefnd til þess að láta eitthvað klinka af hendi rakna í þann bauk. En þar sem við verðum settir niður á kostnað hreppsins er það kannski frekja af okkur af biðja um ölmusu á meðan við drögum enn einhvern anda?

Kreppumaður, 27.4.2008 kl. 01:21

Voðalegur barlómur er þetta, það verða ábyggileg einhver ráð með að hola þér niður þegar þar að kemur.

Já það kostar helling að halda veislu en svona er lífið :) og ég veit þú sér ekkert eftir því, lætur bara svona.

Innilega tl hamingju með fermingardrenginn og vonandi eigið þið góðan dag!

kveðja

Guðbjörg Erlingsdóttir (IP-tala skráð) 27.4.2008 kl. 09:59

Til hamingju með daginn og drenginn. Þá ertu allavega búinn að koma honum í fullorðinna manna tölu - þó það hafi ef til vill nánast kostað þig aleiguna !