Ferming

Í dag var sonur minn tekinn í fullorðinna manna tölu með tilheyrandi hippa serimóníu sem karl faðir hans ekki skildi.  En hann stóð sig vel og var ótrúlega töff og flottur á sviðinu.  Og hélt frábæra ræðu í upphafi veislunnar.  Reyndar ekki langa en ef tekið er mið af karlmönnum í föðurætt hans, þá verða þær lengri og póstmódernískari þegar aldurinn færist yfir.  Um áttatíu manns voru í veislunni og maturinn og kökurnar frábærar, einu orði sagt.  Við kunnum að halda veislur, það verður ekki tekið af okkur.  Og við foreldrar hans og stjúpi vorum ofboðslega montin og stolt af drengnum þrátt fyrir að afrekið á bak við þessa fermingu hafi verið að mæta vikulega í tíma og halda sér vakandi.  En þetta er líka hátíð fjölskyldunnar en ekki bara fermingarbarnsins.  Ég vartiltölulega lítið félagsfælinn og hafði gaman af því að hitta ættingja barnsmóður minnar sem suma hverja ég hef ekki hitt í áratug eða meira.  Skemmtilegast held ég samt að hafi verið þegar drengurinn kom og spurði: pabbi, hvað ætlarðu að gera um næstu helgi?  Ég sagði að það væri óráðið.  ,,Ég var að pæla í að bjóða þér fínt út að borða, ég fékk svo mikla peninga í fermingargjöf!"  Honum langaði semsagt að fara í jakkafötum með föður sínum á fínt veitingarhús og borða steik eins og fullorðinn maður.  Ég sagði að við skildum bíða með það, ég gæti boðið honum út að borða í sumar við tækifæri ef hann endilega vildi dressa sig upp en að hann ætti ekki að eyða sínum peningum í að fita og fylla föður sinn.  Og svo komst ég að því að mái verður troðfullur af veislum sem ég verð að mæta í með þessum ágætu ættingjum mínum.  Frábært tækifæri fyrir drenginn að æfa sig í borðsiðum í þeim, áður en við förum að verða reglulegir gestir á betri veitingarhúsum bæjarins. 

Athugasemdir

[Ragga (IP-tala skráð) 28.4.2008 kl. 15:32]

Til hamingju með drenginn, afskaplega hugulsamur að ætla að bjóða pápa gamla í mat.

[Kreppumaður, 28.4.2008 kl. 16:00]

Takk, takk - Honum finnst hann svo geðveikt fullorðinn núna að hann getur ekki beðið eftir því að fá að planta sér við barborð hér og þar úti í bæ.  Nú hlít ég að byrja að grána....

[Guðmundur G. Hreiðarsson (IP-tala skráð) 28.4.2008 kl. 16:01]

Tek undir fyrri athugasemd; dengsi ekki fyrr búinn að eignast smámonníng, að hann er strax farinn að pæla í hvernig gleðja má þann gamla. Til hamingju með drenginn.

[Kreppumaður, 28.4.2008 kl. 16:20]

Já enda er drengurinn búinn að sjá það að sá ,,gamli" er bestur sitjandi fyrir framan kræsingar með örfá prómill í blóðinu.  Og á þá til að vera gjafmildur.  Ætli hann hafi ekki bara viljað ávaxta sitt pund?

[Ragga (IP-tala skráð) 28.4.2008 kl. 16:41]

Ekki bara hugulsamur heldur klár líka!

[Kreppumaður, 28.4.2008 kl. 16:44]

Það verða allir að reyna að koma sér áfram í þessari veröld - er það ekki?

[Heiða B. Heiðars, 28.4.2008 kl. 17:03]

Til hamingju með sjálfan þig og strákinn

[Kreppumaður, 28.4.2008 kl. 19:40]

Er hamingjusamur með piltinn en sjálfan mig umber ég að gömlum vana.

[systir (IP-tala skráð) 28.4.2008 kl. 19:53]

Til hamingju með soninn, skilaðu hamingjuóskum til hans frá mér.  Leiðinlegt að hafa misst af veislunni en það er varla mikill missir fyrir fermingabarnið, hann hefði svo sem ekki grætt mikið af fátæku frænku sinni...

[Kreppumaður, 28.4.2008 kl. 19:55]

Skal skila kveðju.  Missir af hörku stuði sem er óvenjulegt þegar um áfengislausar veislur í okkar ætt er að ræða.  Missir svo af frábæru djammi 31. maí á sama stað.