Regn og orð

Allt grátt og blaut og þokukennt í dag.  Drullaði mér samt til þess að labba á dvergvaxinn hól með fallegt útsýni yfir lítinn foss.  Og mér datt andartak í hug hversu gaman það væri að sitja við þennan foss í brattri fjallshlíð með allt sem ég hef skrifað útprentað á hvítum blöðum og búa til úr þeim báta og fleyta þeim svo niður fossinn.  Og horfa á orðin berast til sjávar til þess að týnast fyrir fullt og allt.

Orð eru svo léttvæg.  En samt svo þung á metum.  Fer eftir því hvernig þau eru notuð.  Eins og þessi blessaði regngalli minn, hann lekur og er því ekkert skjól fyrir þeim orðum sem eitt sinn hafa kannski verið fleytt niður ókunna á og svo gufað upp til himna og fallið aftur.

Best væri ef ég mundi aldrei tala við neinn aftur.

Athugasemdir

[Guðbjörg Erlingsdóttir (IP-tala skráð) 8.7.2008 kl. 22:20]

Nei heyrðu mig nú,

Ertu alveg að deyja út þarna á fjöllum? Því þessi depurð? Eða er kannski allt að fara til fjandans og ég bara veit það ekki?

[Kreppumaður, 8.7.2008 kl. 22:30]

Ég er bara dauður.  Held að það sé vikuskammtur af þoku sem er að fara með mig

[Guðbjörg Erlingsdóttir (IP-tala skráð) 8.7.2008 kl. 23:33]

Hvernig hljómar þetta aftur, fátt er svo með öllu illt að ekki boði eitthvað gott eða með öðrum orðum blah............! Held líka að ég sé dauð og í hreinsunareldinum á fullri ferð til helvítis!

Andskotans þoka alltaf hreint!

[Kreppumaður, 8.7.2008 kl. 23:35]

Ég held að þokan hérna hafi síast inn í hausinn á mér og ég eigi núna við andlega þoku að stríða.

[Guðbjörg Erlingsdóttir (IP-tala skráð) 8.7.2008 kl. 23:41]

jamm, hljómar fínt. Greiningin er sem sagt andleg þoka og batahorfur fyrir neðan meðallag!

Dauðöfunda þig samt af að vera á þeim stað sem þú ert og hafa ekkert nema fjöllin til að andskotast yfir með eða án þoku.

Held ég sé lent í slæmum félagsskap og dalalæðan bráðsmitandi.

[Kreppumaður, 8.7.2008 kl. 23:55]

Sko, ég þarf ekki nema svona sólskin í klukkutíma til þess að komast yfir þetta ég held að það sé búin að vera þoka hérna síðan fyrsta.  Kannski ég fari núna bara og láti einhvern drykkjusjúklinginn hérna kæta mig.  Nóg er af þeim.