Airwaves og Thor

Ég sakna þess að komast ekki á Airwaves.  Það hefur alltaf verið góð afsökun til þess að vera haugdrukkinn í viku og eltast við ógæfusamt kvenfólk.  En núna er ég fjarri góðu gamni enda skilst mér að hátíðin verði með hálfgerðum (hér hefði átt að standa kreppubrag en ég er búinn að setja orðið kreppa á bannlista svo ég forðast að nota það) nískupúkablæ (ekki gott orð en gagnast) og því kannski ekki eftir svo miklu að slægjast.  Annars er ég að reyna að komast í gegnum höfundarverk Thors Vilhjálmssonar mér til angistar og armmæðu.  Það eina sem hlýst af því er að ég er farinn að ráfa um hérna heima og verðandi frú Kreppa skilur ekki orð af því sem ég tuldra og ég er hræddur um að lesendur verði líka fyrir barðinu á mér síðar, textinn sem á þetta blogg ratar, óskiljanlegur, setningar flóknar og innihaldið allt í módernískri upplausn.  

Rokkað í skugga kreppu

Athugasemdir

[Guðmundur G. Hreiðarsson (IP-tala skráð) 15.10.2008 kl. 13:05]

Hefur Thor skrifað eitthvað nýlega? Þræðir hann ekki bara opnanir á hinum ýmsu listviðburðum  á mígandi rassgatinu, hm.

[Bergur Thorberg, 15.10.2008 kl. 13:06]

Hafðu ekki áhyggjur af Airwaves eða kvenfólkinu. Þú ert með staðgengil í mér. Um búsið sérðu sjálfur. Thor er sjálfur í postmódernískri upplausn, þessa dagana.

[Kreppumaður, 15.10.2008 kl. 13:13]

Guðmundur:  síðan sonur hans varð forsetaritari hefur ekkert komið út!  Og er karluglan ekki orðin of gömul til þess að drekka?  Er ekki eitthvað gamalmenna aldurstakmark? 

Bergur: Thor er allur að leysast upp, það er rétt.  Og illa gert af okkur að hæða gamalmenni í andaslitrunum.  En við meinum ekki ill með því og hann á það skilið fyrir bækur eins og Óp bjöllunnar!!! 

[Svanur Gísli Þorkelsson, 15.10.2008 kl. 15:41]

Thor hefur aðeins skrifað eina góða bók og hún var ekki hans frumverk en var það vel þýdd að hún gæti alveg talist það. Grámosinn Glóir sem hann skrifaði strax á eftir þýðingunni á Nafni Rósarinnar er besta bókin hans enda undir miklum áhrifum frá rósinni.

En hei, þetta er allt svo postmodernískt að maður getur sagt hvað sem er.......blabla

[Kreppumaður, 15.10.2008 kl. 15:49]

Nafn rósarinnar og Hlutskipti manns eru snjallar þýðingar, það verður víst ekki af honum tekið.  En einu sinni hlustaði ég á hann lesa upp og mér fannst að hann hefði átt að hafa táknmálstúlk, þá hefði ég allaveganna þekkt táknin ,,góður" og ,,bless" og skilið eitthvað...

[Bergur Thorberg, 15.10.2008 kl. 16:19]

Texti Thors Vilhjálmssonar öðlast nýtt líf... þegar Thor Vihjálmsson les hann sjálfur...... upphátt líka.

[Kreppumaður, 15.10.2008 kl. 16:27]

Það er tónlist sem einungis guðirnir skilja...

[Bergur Thorberg, 15.10.2008 kl. 16:48]

...les hann sjálfur....framhald..... og kemst að því, að hann hefur ekki hugmynd, um hvað hann fjallar. Sjálfur. Thor ætlaði alltaf að verða málari. Kommon.

[Kreppumaður, 15.10.2008 kl. 16:58]

Það besta sem henti Thor var þegar sá mæti málari Sigurður St. Th. Sigurðsson, heitinn, tuskaði hann úti í Frans.