Þegar ég ætlaði að setjast að á Spáni

Einu sinni fann ég útmigna dýnu bakvið ruslagám á Spáni.  Ég sagði þáverandi kærustunni minni að ég vildi fá að eiga heima á dýnunni bakvið gáminn.  En hún mætti koma að heimsækja mig ef hún ætti einhverntíman leið hjá.  Henni fannst það ekki sniðug hugmynd en með mútum tókst henni af fá mig ofan af þessu plani.  Ég sé alltaf dálítið eftir því.  Mig langar að vita hvað hefði orðið um mig ef ég hefði sest að á bakvið ruslagám á Spáni?

Sofnaði í ruslagámi og lenti í ruslaþjöppu

Harðinda vetur

Það stefnir í að allt frjósi sem frosið getur á Íslandi.  Bankar, peningar, sauðir og menn.  Loksins getur Ísland borið nafn með rentu.  Og útlit fyrir að hægt verði að skauta á tjörninni eða á frosnum fimmþúsundkörlum, ef þeir eru bara lagðir nógu margir saman.  

Afborganir verði frystar

Ókeypis bjór Eiki

Gott að vita til þess að einn Íslendingur nái að slá í gegn í Bretlandi.  Er samt ekki vissum að Eiríkur ætti að láta sjá sig aftur á West Ham leik, svo mikið hefur hann náð að pirra óvini okkar.  Og það þessi dagfarsprúði maður.  Held að ég bjóði honum upp á drykk næst þegar ég rekst á hann...

Fjögur hundruð bloggfærslur

Velkomin til Simbabve

Einu sinni var Ísland kallað Tæland norðursins og Reykjavík var full af alls konar graðnöglum og pervertum sem höfðu séð heilsíðu auglýsingar í blöðum sem sýndu glyðrulegt Íslenskt kvenfólk í sleik.  Nú er góðærið liðið hjá og allar stúlkur orðnar siðprúðar og blankar og sitja heima og hekla.  Og fyrst farið er að líkja okkur við Simbabve hljóta að fara að flykkjast til Íslands feitir svartir einræðisherrar sem ætla sér stóra hluti við stjórn landsins.  Kannski við ættum að fjárfesta í nokkrum fílum til þess að hafa sprangandi í Fossvogsdalnum?

Simbabve norðursins

Næst er það að betla

Þá er það orðið ljóst að Íslensku þjóðinni hefur verið allstaðar úthýst.  Enginn vill við okkur kannast eða af okkur vita.  Þetta er svipa ástand og henti mig um árið þegar mér var boðið í mat en þegar ég mætti á svæðið var húsráðandi ekki heima og öll ljós slökkt.  Það er búið að skella á okkur öllum hurðum.  Leiðinlegt fyrir sinfóníuna þó að missa af þessum tónleikum en meðlimirnir verða eflaust brátt vegna efnahagsástandsins að spila niður í Austurstræti með hljóðfæra kassana opna fyrir framan sig í von um aur.

Vilja ekki íslensku sinfóníuna

Ég er heimskur í dag

Andskotinn hafi það hvað get ég sagt af mér?  Það er nákvæmlega ekkert að gerast.  Ég kem engu í verk og nenni varla að tala. Hef samskipti við kærustuna mína í gegnum msn eins og ég væri í kílómetra fjarlægð en ekki bara á annarri hæð.  Ég dreg þó enn andann.  Ég fór út að borða í gær.  Ég las bók.  Heilinn í mér er steindauður af því að lesa eintóm ótíðindi.  Mér dettur ekkert í hug.  Kannski er það aldurinn sem er að forheimska mig?  Kannski hef ég alltaf verið svona heimskur en er bara fyrst að fata það núna?  Ég þarfnast einhvers sem er uppbyggilegt og það strax! 

Kreppumiðstöð

Nú er ég sár og móðgaður.  Búið að opna Kreppumiðstöð án þess að ég hafi verið beðinn um að veita henni forstöðu.  Alltaf er það eins á Íslandi, einhver flokksgæðingur tekinn fram fyrir hæfan almúgamann.  Þrátt fyrir það að þjóðin kalli á breytingar, gerist ekkert.  Ég er farinn í fýlu.

Upplýsingamiðstöð fyrir almenning

Guðfaðirinn 4

Best að afturkalla svona reyfara og endurskrifa þá.  Í stað þess að mæra forseta vor sem faldi sig á spítala meðan hrunið gekk yfir, þá verður farið í saumana á þessu máli og hann eflaust gerður að torkennilegum guðföður í þessari óreiðu sem er víst að sliga efnahagskerfi nokkurra landa.   Og þá verður fróðlegt að sjá hvernig forsetinn bregst við.  Vonandi verður páfinn ekki myrtur því að ég sé ekki hvernig hann komi þessu máli við?  Og þó?  Eftir að hafa lesið alltof margar bækur um frímúrara þá kæmi mér ekki á óvart að þetta væri bara eitt stórt samsæri.  Vonandi skrifar einhver bók um það mér til afþreyingar. 

Forsetabók afturkölluð úr prentsmiðju

Slokkna nú öll ljós...

Alls staðar er lokað á okkur Íslendinga sem vorum ríkastir og klárastir fyrir tveimur vikum.  Það er bara fyrirsláttur að það sé mengun að kenna að vatnið hans Ólafs megi ekki falla forseta okkar til dýrðar í New York.  Nei, nú hafa Bretar enn og aftur minnt sína gömlu nýlendu á einhvera baktjaldasamningu og fengið þá til þess að ofsækja fátækan listamann í útlöndum.  Sennilega sker hann af sér eyrað núna í örvinglan.  Örlög okkar Íslendinga eru nú þau að hverfa hægt og rólega inn í myrkur andúðar og haturs sem allstaðar virðist ríkja í okkar garð.  Gott ef það verður ekki lokað á mig hérna á barnum?  Og ef ekki, þá verður það fljótlega!  Kortið mitt er hvort eða bæði slitið og merkt banka sem búinn er að fá nýja stjórn og nýtt nafn ef hann er þá ennþá til?  Best að fara og athuga hvort það sé hægt að strauja það einu sinni enn og kaupa rauðvíns glas sem kostar mig á bilinu 750 - 1500 krónur.  Svona eftir því hvort að Bretar vaka eða sofa yfir óförum okkar?  Og mér finnst eins og þeir hafi gleypt heilan helling af koffínpillum, því að glasið er alltaf nær 1500 kallinum en hitt.  Best að fara að gráta ofan í glasið.

Slökkt á fossum Ólafs í kvöld

Skaðabætur til Hollendinga

Nú á að veiða síld og súrsa eða salta ofan í tunnur (eða guð má vita hvernig hún er meðhöndluð) og senda svo allann farminn beint til Hollands en í þeim hrepp þykir víst gott að sporðrenna síldinni með haus og öllu, beint ofan í maga.  Helst hrárri.  En maður sem á ættir sínar að rekja til þjóðar sem mígur yfir hákarl og étur hann svo, þar sem gamlir karlar geymir blóðmör í súr í stórum majonesdollum undir rúmi til þess að geta svo steytt úr hnefa yfir bók, ætti nú kannski ekki að vera að gagnrýna matarvenjur lánadrottna okkar?  Miðað við fréttir frá Íslandi þá verður slegist um síðasta blóðmörskeppinn og lagt til fólks með kutum vega hálfrar hrossabjúgu út næsta áratugina og það að vera feitur verður ekki lengur tákn um leti heldur að viðkomandi sé útsjónasamur búkarl.

Leggja til auknar veiðar á síld