Komin til Íslands á morgunn

Þessi leynigöng eru tilvalin fyrir Davíð og auðmenn og skattsvikara til þess að nota næst þegar þeir hittast á leynifundum til að ræða hvernig eigi að stela síðustu verðlausu krónunni.  Hægt að láta þau liggja frá Seðlabankanum niður í Stjórnarráð.   Þessi göng verða pottþétt komin til Íslands á morgunn.  

Leynigöng til sölu

Gáfaðasti maður í heimi

Þetta er gáfaðasti maður í heimi!  Hann er mín sól og vonarstjarna og veldur því að verðandi frú Kreppa hefur alltof oft sakað mig um að halda framhjá sér með gulum broskarli.  Það er ekki rétt, ég þekki bara leiðtoga um leið og ég sé þá og ekkert rangt við það að hafa hálfguði.  Ef við hefðum uppgötvað hæfileika hans fyrr þá hefði ekki allt farið til fjandans.  Ég lýsi því yfir stofnun sértrúarsafnaðar með mig sem æðstaprest, fyrir þá sem vilja baða sig í ljósinu og hinni einu réttu sýn.

Þeir felldu bankana

Sjálfstæði þjóðarinnar ákveðið

Nú er verið að pæla í því í rólegheitunum hvort að leyfa eigi einhverjum banka að yfirtaka Ísland eins og hverja aðra fasteign í vanskilum. Get ekki sagt að ég sé því fylgjandi að Alþjóðagjaldeyrissjóðurinn hjálpi okkur.  Finnst betra að við betlum af nágrönnum okkar.  En fyrst Rússar eru eitthvað efins og enginn hefur boðið þeim að kaupa ónotaðan herflugvöll (sem var breytt í háskóla.  Hverjum datt það í hug) og Norðmenn vilja ekki taka okkur til baka, þá verðum við víst brotlenda sem þarna.  Og verðum undir eftirliti alþjóðlegra snillinga sem munu hamla allri útrás og kaupahéðnaskap sem við erum búin að stunda með mismiklum árangri í næstum 1200 ár.  Og ef við fáum ekki að braska að vild og setja önnur lönd á hausinn með fíflagang, hvernig eigum við þá að geta talið okkur sjálfstæð?  Verður okkur kannski líka bannað að selja fisk?      

Ákvörðun á allra næstu dögum

Íbúar Sódómu í mál

Mér finnst að íbúar í Sódómu og Gómorru eigi að fara í mál við guð vegna þess skaða sem hann hefur valið á eignum þeirra.  Jafnvel ættu allir íbúar heimsins að kæra hann fyrir Syndaflóðið?  Þessi karlgarmur ber ábyrgð á svo miklum hörmungum og eyðingu að Hitler virkar sem meinlaus ljúflingur við hlið hans.  Hvenær á þessi guð að sæta ábyrgð og viðurkenna það að hann hatar mannkynið og vill því ekkert nema illt?  Hvenær verður hann vistaður á Litla Hrauni upp á vatn og brauð fyrir öll þau morð sem hann hefur á samviskunni?  Og svo erum við hissa á því að barnaníðingar og dópsalar haldi áfram iðju sinni að lokinni afplánun?  Fyrirmyndin er lofsömuð í bók sem finnst í skúffum á hverju einasta hótelherbergi um víða veröld. Sennilega er þessi guð líka heilinn á bak við ofsóknirnar sem við Íslendingar verðum núna fyrir af hálfu Breta.  Hann er þekktur fyrir það að níðast á þeim sem minna mega sín.  Bölvaður.  Drögum hann fyrir stríðsglæpadómsstólinn í Haag strax!

Máli gegn guði almáttugum var vísað frá

Húsgrunnur og heimska

Ég á tvöhundruð sjötíu og átta þúsund inni á banka.  Mér finnst það fínt miðað við það að ég hef ekki stundað reglulega launaða vinni síðan í vor.  Ég hef ávaxtað mína verðlausu peninga vel í þessari kreppu sýnist mér.  Enda eyði ég ekki svo miklu.  Ég lifi nefnilega á unnustu minni, svona í augnablikinu.  Ó já, ég er mannleysa og skammast mín lítið fyrir það.  Það eina sem ég kaupi er stöku humar eða brauðbiti og einstaka flaska af víni.  Ég á enga byggingalóð sem ég þarf að skila.  Enda mundi ég aldrei nenna að byggja.  Ég man hvernig foreldrar mínir höfðu það þegar þau voru að skríða yfir þrítugt.  Þau voru drullug upp fyrir haus að naglhreinsa spýtur, slá upp mótum eða að draga steypustyrktarjárn yfir moldahauga.  Bara af því að þau gátu ekki fundið sér neitt skárra áhugamál en að byggja hús.  Og stundum var ég nauðugur dreginn í grenjandi rigningu upp í húsgrunn á heimsenda og settur í það að rétta nagla eða raða spýtnabraki í hrúgur.  Ég hataði það.  Það truflaði mig frá lestri bóka og öðrum sérviskulegum áhugamálum sem átta ára börn eiga að hafa.  Ég datt oft á hausinn í hina og þessa drullupolla.  Ég steig oft á nagla.  Og pissaði á buxnaskálmarnar því að ég var of skjálfhentur af kulda til þess að stýra bununni á vegg.  Það er helvíti að byggja og ég verð bara svo þreyttur við tilhugsunina um að fólk fórni tíma og orku í svoleiðis vitleysu að ég er að hugsa um að fara á næsta bar til þess að jafna mig.  Helvítis vitleysa að koma sér upp húsi með eigin höndum sem er stærra en það sem hægt er að gera á smíðavöllum!      

Milljarða bakreikningur

Drottning vor talar

Gott hjá Dorrit að mæta í viðtal og lesa upp af blaði smá ræðustúf sem karluglan sem hún er gift var búin að skrifa.  Minna á lopapeysur og sérmeti á þessum síðustu og verstu tímum.  Segja þjóðinni að kaupa innlent.  Að lopapeysu iðnaðurinn sé næsta útrásarsóknarfæri.  Allar ömmur munu verða hluthafar í lopi group og brátt munu Bretar ekki klæðast neinu nema gráum og svörtum lopapeysum.  Og við endurheimta bankana okkar.  Og þeim stjórnað af ömmum í lopapeysum.  Það er svo sem ekkert kúl en betra en ekki neitt.  Lifi drottning vor.

Dorrit bjartsýn á framtíðina

Breima

Þá veit ég það.  Rauðvín og Bee Gees í botni og ég fæ aldrei hjartaáfall.  En til hvers er það?  Rauðvín er gott en Bee Gees er versta hommavæl allra tíma.  Bara það að hugsa um þessa falsettukónga gerir það að verkum að ég fæ óbragð í munninn og viss líkamspartur skreppur saman og hverfur.  Þá er betra að hjartað hætti að slá ef svona kattar breim á ekki að vera í eyrunum á mér alla daga.  Svei. 

Bee Gees hollir hjartanu

Að skemmta öðrum

Mér hefur verið skipað að hætta að blogga eða lesa helvítið hann Thor og gerast skemmtikraftur á heimilinu.  Ég veit ekki hvernig ég á að fara að því að skemmta?  Kannski joggla með nokkrum rauðvínsflöskum?  Það er hætt við því að það færi illa og allt yrði úti í glerbrotum?  Og ekki get ég farið með gamanmál.  Í því er ég hundónýtur.  Ég kann ekki að dansa, ég er tapsár í spilum, vonlaus í feluleik, meira að segja frúin í Hamborg er mér ofviða.  Og ekki get ég kallað keðjureykingar leik?  Djöfull sé ég fram á leiðinlegt kvöld vegna þessarar pressu!

Bretland sokkið

Það ætti að vera orðið öllum ljóst að við erum í fýlu út í Breta.  Já, eiginlega hötum við þá bara.  Enda eru þeir þjóð með ljótustu tennur í heimi, öfugt við okkur.  Slítum stjórnmálasambandi við þá og látum svo eins og þeir hafi aldrei verið til.  Og hættum öllu frekara tuði um þessa vitleysinga.  Ég ætla að gera það.  Bretland?  Hvað er það?  Sökk það ekki með Atlantis?

Höfum ekki sagt NATO að Bretar séu óvelkomnir

Serbavisíón

Þetta er alveg eins og þegar við ætlum að sigra Serbavisíón með einhverjum hallærislegum poppsmellum sem þjóðin heldur alltaf að séu bestu lög í heimi.  Og þegar það var fullreynt með það að frá þeirri keppni riðum við ekki feitu hrossi, þá var bara reynt við þá næstu.  Að fá að vera bergmál frá röddu Bandaríkjamanna í Öryggisráðinu.  Og ekki gekk það vel.  Engin 12 stig til okkar í þetta sinn.  Töpuðum fyrir Austurríki og Tyrkjum.  Mér finnst við alltaf vera að tapa fyrir Tyrkjum.  Það var hrein heimska að afnema lögin um að Tyrkir væru réttdræpir á Íslandi.  Þeir kom fram við okkur af meiri virðingu þá og leyfðu okkur meira að segja einu sinni að vinna sig í fótbolta.  Þeir hefði þá líka gefið okkur eftir sætið sitt í Öryggisráðið.  Það hefði glatt Bandaríkjamenn.

Ísland náði ekki kjöri